Friday, March 9, 2012

                                      देव
                                 ----------



                                    सुंदर पक्षी ,सुंदर नक्षी
                                     सुंदर मोहक नजराणे ,
                                        पाहून खेळ नभांचे सुंदर ,
                                   तरळते ओठी सुंदर गाणे ...

                                      नजाकतीने बसले सारे ,
                                      सुंदर तारे अन तारका सुंदर
                                     आभाळातील अथांग निळाई ,
                                  मनास भासे विशाल सुंदर ...

                                       इथे खालती हिरवाईने ,
                                    सजले डोंगर अतीव सुंदर ,
                                   पाझरती जणू आनंदाश्रू ,
                                      तृषार्त होऊनी  वर्षा सुंदर .

                                     मनीमानसी प्रत्येकाच्या
                                    असेल सुंदर हा देखावा
                                    अनंतात अन अथांगातही,
                                    सुंदर देव मज भेटावा ...    

Friday, March 2, 2012

आठवण

                                      येईल आठवण माझी जेव्हा,
                                      वा-याला तू सांग,
                                     पाठवेन मी नाजुक हळव्या,
                                      आठवणींची देखणी रांग...
                      
                            आठवणींचे पक्षी दिसतील,
                              आभाळी नक्षी कोरताना...
                          हरवून जाशील स्मृतीत माझ्या,
                            पुन्हा मला तू स्मरतांना...

Thursday, February 23, 2012

समृद्ध वेदना..

                                              आठवणींच्या सांदीत चिमटलेलं मन,
                                            विरहाच्या दुःखाने ओघळलेली आसवे,
                                             डोळ्यातुन निसटुन गेलेलं स्वप्न..जे
                                              अजुनही शब्दात मांडता येत नाही  तरीही..
                                                  हिरमुसल्या शब्दांनी व्यक्त करायची माझी तडफड..
           
                                     तुझं भांबावलेपण, भिरभिरणारी नजर,
                                 थरथरणारे हात, वाट बघण्यातली  हुरहुर...
                              पण त्याच वेळी, मनातलं ओठांवर येवू न देण्याची
                                तुझी धडपड...
                                           
                                            जे व्यक्त करायचं होतं पण केलं नाही,
                                          अशी खंतावलेली मनं घेउन वावरणारे
                                            आपण दोघं.....

                             आता फक्त , चित्ताला बिलगलेल्या आठवणींनी ,
                            शब्दलावण्याची वेल बहरते..मोहरते ..पण
                                रंग गंध नसलेल्या अव्यक्त फुलांसारखी....

Friday, February 3, 2012

हसरा तारा

                                   गंधाळल्या  फुलांना , बिलगून रानवारा ,
                                सांगतो गुज मनीचे ,लाजुनी हसरा तारा...
                                तेजाळले नक्षत्र मनीचे ,फडफडली स्मृतींची पाने ,
                                बेधुंद होऊनी वारा ,गाई अलवार प्रीतीचे गाणे ..

                                     हळुवार स्पर्शिता मनाला ,हृदयी स्पंदने थरथरली ,
                                    घेता कल्पनेतल्या मिठीत ,लज्जेची सोनपाखरे भिरभिरली ..
                                     होते स्वप्नवत सारे ,त्या दूरस्थ तारकासारखे...  
                                 बोलणे राहिले दूरच , आता भेटण्यास सुद्धा पारखे . 

                                           झाले सारेच शांत आता ,झाला अबोल वारा ,
                                       न सांगताच अबोल झाला ,देखणा हसरा तारा ..


                         
       
                        

                    

Friday, January 27, 2012

चेहरा

                        नकोस लपवू खरा चेहरा,        
                      खोट्यास म्हणती फक्त मुखवटा
                  न सांगता तु सर्व काही,
               सांगुन जातो तुझा चेहरा..  
  
 बोलायाचे असते तुजला,
पण संभ्रम असतो मनामध्ये,
न बोलता तु, बोलुन जातो..
मुक्यापरी तुझा बोलका चेहरा. 

टिपता अलगद भाव तयाचे,
मोहरतो तुझा खरा चेहरा,
सांगुन जातो गुज मनीचे..
प्राजक्तासम तुझा, प्रांजळ चेहरा.


                                                                  

                                                         

Sunday, January 22, 2012

व्रण..

             
आठवूनी ती आस अनावर 
        पाझरती डोळ्यांचे झरे ,   
मौन सुटेना तुझे निरंतर
का छळसी मज सांग खरे.

टिपून अलगद तळ डोळ्यांचा ,
ठेवून 'सल' तो उरामध्ये ..
फिरती भिंगरी आठवणींची 
                                                           थरथरत राही मनामध्ये..   
                                                       
                                                               थरथरणाऱ्या त्या भिंगरीला , 
    कोंदण आता मैत्रीचे 
बघता जाशील आत अंतरी 
दिसतील व्रण त्या प्रीतीचे ..
 
                              

Wednesday, January 4, 2012

कविता

आवडेल मला तुझ्या ओंजळीतल ,
प्राजक्ताच  फुल व्हायला ,
जेव्हा ,
हळुवार पणे घेशील सुगंध त्याचा ..आणि 
बघत राहशील त्याच्याकडे अलवार  नजरेने.
मनभोरपणे.........
मला जाणवेल तुझ्या श्वासातला मदभरा गंध,
 हाताच्या तळ्व्यांचा उबदार स्पर्श आणि
तुझ्या  सहवासातल लोभसपण,
तुझ्या डोळ्यातील  लक्ष दिव्यांच्या तेजाने उजळेल
माझं जीवन आणि जगणं सार्थकी लागेल
किंचित आयुष्य लाभलेल्या त्या प्राजक्ताच्या
फुलासारखं...